Нешла  мезла  кьадри адамла г1ямрулизиб  дебали  халаси саби.Вишт1аси нешла  дукелц1иличил, усаахъес  буч1уси лайлаличил ,цаибил   ганзличил  , неш- дудешла лявличил дарган  мез руркъес   вех1ирхьули сай .  Бег1ла гьалар  нешла мух1лилизирад  сари илини иргьути ва  г1ерисути цаибти насих1ятунира .Дарган мезличил  сай ил   тянишируси  вайси ва г1ях1силичил . Вишт1ах1ели  нешлизирад , дудешлизирад  , тухум – агьлулизирад, сай алавти адамтазирад нешла мез г1ерисути сари вишт1асили . Сецад х1ейгиси биалра ,бек1лил  гъай  х1едалуси хъяшачил урус мезли гъайбик1утира гьаннала замана  къаршибикули саби, ил « мода» бетаурли саби

Ашкарлигу , вишт1асини урус мез дагьни мях1ничебси сек1ал саби. Урус мез дяркъес г1ямрулизиб вишт1асила сецад дигара имканра леб : садиклизиб, школализиб ва  сунела зилантачил х1язтавиркьух1ели , нешла  мез  дяркъесван ах1и .Илбагьандан вег1ла миллатла мез дагьнилизиб хъалибаргла, неш-дудешла халаси кьадри леб .  Даргала  районтала дураб    , шагьуртазиб х1ербирутали  вег1ла мез далнилизиб халаси кумек леб хъулиб нешла мезличил гъайбик1нилара.  Дебали г1ях1си саби каникултала  замана дубурла шилизиб  х1ербирути хала нешаначи , хала дедушуначи бишт1ати г1ях1ладли  башнира , илдачил   ихтилатбик1нира  .  Шимазиб х1ербирути зилантачил х1язли биркьух1елира руркъу илдани нешла мез  .

    Гьай-гьайра школабазир нешла мез руркънира  нешла мезличи бурсибирнила  мяг1ничебси бут1а саби. Ишаб учительла пагьмукардешлизибад   дигахъу дурх1нани чула мез  секьяйда руркъул.  Наб гьанбиркуливан , бишт1атачи халаси асар биру жагали далкьаахъурти , даргала мезли делк1унти , дурх1нас хасдарибти жузанира, «Къиргъу» журналлира.

Дебали г1ях1сири «Замана» газетализиб дурх1нас  хасбарибси бях1 (рубрика) биаллири.

   Дарган мезли дуч1ути далуйтира бишт1атала урк1бази нушала мезличи диги адилкьа или гьанбиркули саби. Дебали г1ях1сири дарганти  Россияла игитуначил , артистуначил , бурибти спортсментачил  гьунибаъниби дурадурк1алри ва илдачил дарган мезли ихтилатбик1алри.

    Миллатунала мезани руркъниличи цацадех1 школабазиб камли пикри бях1чииули саби. Илдас планнизир  итира камли дек1ардарибти сяг1ятуни урус мезла , математикала яра царх1ил «мяг1ничебси» дарслис лугули сари.

  Халаси пикри ва х1ерахъуди бях1чиаэс г1яг1нили саби дарган мез калахъес ва чеимц1адарахъес . Ил нушала гьарилла чебла саби.  Мез деткахъили г1ергъи , беткайхъуси саби лебилра нушала миллатра. Илгъуна бетаахъес асух1ебирар.

   Нешла мезличи дурх1нала  диги  чеимц1абик1ахъес багьандан миллатунала  мезаначилти передачаби имц1адаралри г1ях1си бири .  

Дила жанван дигахъис наб дила нешла мез. Нуни  хъумартес х1ейрус жявх1елла « Даргала гьунила» чедиб леслизиб ч1акала пукьаван белшунси  дила  бишт1аси Джурмачила ши, шила шанти ва дила нешла дарган мез.

                                                                                                     Магомед  Абакаров