Жуз – ихтилатчи саби , мех1е лерси ,

                    суранни чедибуцибси , дигянати анц1 –

                      букьлумачила лех1кахъили буруси .

                                                          Алишер НАВОИ

                                         Магомед АБАКАРОВ

                                         МКОУ «Косякинская СОШ»

                                         Кизлярского района Р\Д

Жузла кьадри адамла г1ямрулизиб халаси саби Жяв манзилличибад адамти жузличи (Талмут, Библия, Кьуръан) дурхъаси сек1айчиван х1ербик1утири. Жуз – г1якьлула г1инизван , багьудлуми дих1уси духуриван адамтали мях1камли бих1усири. Жузлизи белк1унсиличи бирхутири , илала х1урматбирусири.

  Жузи дуч1уси адам дебали духуси , гьар се сек1ал далусилизи халирусири:

              Урхьнази лайбак1ибил

               Лукьман – х1якимла табтар

               Х1ези дикили далан

                Дила, Мунгила Г1ях1мад …

                                   (Г1. Батирай)

Ишбарх1ира жуз , чеалк1уси наслули сунезибад багьуди ва г1якьлу кайсуси , г1илмуртала урунж саби.

  Жузлизибад саби ник1а буч1антани дуньяла ва шярг1ла , океантала ва ахъти дубуртала , х1урк1бала ва чузир жаниварти , дуг1ла арцанти х1ердирути вац1урбала ва дуб агар диркьурбала диг1яндешуначила балуси.

   Жузли Ват1айчи дигира , х1илликартачи гьимира , урк1базир гъабзадешра , вег1 ак1убти мер – мусаличи карц1ира , дигайра , улкаличи пахрура адикьес бирар.

Писательтани делк1унти повестунира , рагъамтира , очеркунира , новеллабира дуч1ух1ели уршби – рурсбас илабти литературный геройтачи мешубикес дигахъу , илдазибад г1ибрат1 кайсу.   

   Жузи дуч1ути адамти царх1илтазибад г1якьлула мурхьдешличибли , багьудлумала бугадешличибли дек1арбулхъан. Илдани царх1илтаничир т1абиг1ятла анц1букьунира , халкь ургар алк1ути масъултира мурхьли пикридиру . Илдачи адамти лех1ихъес дигахъу , илдазибад г1якьлу г1ерису.

   Жазазир сари нушачи даибти даршани дусмазир инсаниятли дучибти багьудлуми. Рахли адамлис сегъуна биалра саниг1ят асес дигули виалли , илис чебиркур жузазирад багьудлуми кайсес , илди руркъес.

Дуньяличир дахъал библиотекаби лер , чузирра даршани азирти жузи дих1ути. Илди сари гьарли марти багьудлумала г1инзурби ,чузирад чеалк1уси наслули багьудлумира , духудешра  , г1якьлура кайсути.